两半生，将某事物分成或扳成两块。“大家勿要吵，今朝忒块场，篮球地就分成两半生，通通打半场子。”“侬看，蛮好只盘子，拔侬敲成两半生，老爹要肉麻（心痛）煞了。”

抢羹饭，形容做事急出乌拉，急吼吼。“急啥急，又呒没人跟侬抢羹饭。”“一副抢羹饭的腔调，好像三天呒没吃饭了。”

借因头，找借口的意思。“只要爹爹一加班，侬就借因头出去。”“借啥因头啦？岁数到界了寻女朋友白相又勿坍台。”

做人家，勤劳节俭会过日子。“阿拉楼里相，要算张师母最做人家了。”“侬又勿缺铜钿，何必嘎做人家。”

望夜眼，呒啥目的地东张西望。“手头生活嘎西多，侬哪能也有空望野眼啦？”“伊正经事体勿做，就欢喜立勒窗口望野眼。”

搭将货，上海话里有“搭将”的说法，基本同义“摊板”，就是“蹩脚”，勿灵光。搭将货也就是摊板货，不仅是指东西，也可以指人。“忒老徒就是个搭将货，只会吹牛皮。”“嘎搭将合货色（东西），谢谢侬下趟勿要（合起来念fiao）拿（nai）来了！

煨灶猫，一般描绘赖嗒嗒呒没精神的人，就像煨勒拉灶头边上的猫。“侬哪能一日到夜睏勿醒，弄得像煨灶猫”，“头发去梳梳（si）好！像只煨灶猫啥人高兴带侬出去？”

伤阴揭，指做缺德或伤害别人的事体。“忒种伤阴揭的事体，做勿得合！”“嘎伤阴揭的事体，忒种人哪能也做得出，真要杀千刀。”（顾顺麟）