文 周曙明（本报特约通讯员）

串门，就是老底子“到别人家去闲坐聊天”。而现在辰光，“串门”正勒拉逐渐减少，可是对老年人来讲，“串门”是生活当中不可缺少个内容啊。

随着浦东的开发建设，动迁到小区里个东宅浪张伯伯，西宅浪陆婶婶，伊拉差勿多日（ni）日要回到老宅上来白相。侬看，伊拉又来了，就坐拉伲场门前的丝瓜棚下头，搭伲娘子，还有大阿哥小婶妈佬啥一淘唠白。讲伊拉住拉小区里邪气勿开心。一个楼面上的人家，是“黄牛角，水牛角——各管各”，就是勒拉电梯里向碰着，也是面东人看面西人。“唉——”陆嫂嫂叹了一口气讲：“伲登拉十楼浪向，就像关拉鸽笼里。每日天吃饱仔饭，也没多少家务要做。看电视么，眼睛吃不消；下楼白相么，‘脚脚踏生地，眼眼见生人’”。

是啊，老早能登拉乡下头，宅上向个个人认得，家家熟悉。开出门来，碰着人就打个招呼：“老妈妈，侬早饭吃了哇？”“黄伯伯，迪能早，要到啥地方去？”“老爷叔啊，侬‘上镇哪能勿拿篮，功夫能啥闲’？”一日天就开始了。

早浪向，我端仔一碗热粥，就着两条老（萝）卜干，走东家串西家，迪个叫“卖饭碗”。伲老妈妈看见了，就讲：“啊呀，小弟个粥薄来像面镜子，小囡要养僵脱哉。过来，吃块摊面饼。”我连忙讲：“谢谢老妈妈！”

老早能，槿树园里人家侪没田，过日脚侪靠“撩鱼摸虾”。爷叔伯伯佬啥日日吃早饭要到大场地浪去，一面吃一面商量，啥地方野浜头里螺蛳多、蚌多、虾多，哪一个小菜场里野河鲜好卖……过后，三人一组，五人一伙，背着簏，掮着撩网、挟网、螺蛳网，到野浜头里去“寻饭吃”。

落雨以后，田里生活勿好做。伲娘就拿只铺好的鞋底、几根扎鞋底线，一路浪向“嘶——嘶——”地扎，到西新宅老妈妈户里去，扎着鞋底，讲一些无关紧要的事体。张家阿大过年要卅岁了，拜托我娘寻个“缸香炉配木蜡台”——家境差不多的姑娘家；李家姆妈的侄囡吃仔年夜饭要廿八岁了，伊拉爷娘侪急来要死（xi）。俗话讲“只有黄瓜落苏沿街卖，哪有黄花闺女送上门？”几趟的“串门”以后，小姑娘小伙子个婚事有仔着落。邻舍隔壁侪讲“迪趟阿小拉娘功劳顶大，十八只蹄  逃不脱哉！”

南宅浪个杨嫂嫂，嘴巴邪气碎谗，常庄传播一些乱七八糟的“新戏闻”：看见某某人，老清老早勒拉啥人家竹园里向垦竹笋；昨日子看见南宅上某某人家媳妇，面孔  来雪雪白，嘴唇  来血血红，乘上了一辆陌生车子……讲来有花有朵，还关照勿要讲出去。啥人晓得女人的肚皮大心底浅，半日天不到，宅浪向人侪晓得  。不久传到了当事人的耳朵（nidu）里，闹得来伯姆淘里，婆媳之间，隔壁邻舍佬啥起了口角闹了矛盾。大家称迪种女人叫“破蒲扇”。沪谚讲：“宅上（lang）出把破蒲扇，搅得满宅不太平。”朝下起，远远看见“破蒲扇”来串门了，大家就关门，啥人想卷到是非堆里去？

所以末，往往男人勿赞成女人出去串门。但是勿赞成归勿赞成，有事体归有事体，女人们照样串门。不久，“破蒲扇”也改换门庭，口齿也紧了起来。伊也怕人家戳脊梁骨啊！

串门，是老早民间基本的社交形式。通过串门，有喜事大家分享，有难事大家帮忙，有苦闷大家分解。怪勿得张伯伯，陆婶婶伊拉初进小区没了“串门”，就感到不习惯。

现在，郊区脱市区的生活节奏一样，也快起来了：后生家一早像打仗，日里向天天要上班，夜头来手机要上网。老年人的生活环境变了，呒没了“串友”，“串门”也就难了。（注：本文请用沪语阅读）