上海本地老宅里，一般侪有口井。当上海大规模兴建石库门弄堂个辰光，因为同时接进了自来水，所以大部分石库门弄堂就呒没水井了。当然还有例外，像麦琪里。

麦琪里每一条横弄堂个转角上，侪有一口水井。麦琪里建于上世纪二十年代后期，忒个辰光上海已有相当规模，尤其是租界里市政管理比较规范，按现在个建筑术语来讲，属于“三通齐全”。麦琪里自然是户户侪有水有电，但仍旧非常人性化个筑有好多口水井，保留了江南民居个特色。我想，当初挖水井，一防断水，二防火警，三可方便居民。即使比麦琪里造得早交关个石库门弄堂里，也呒没看到有噶西多井。

当然水井常年封有厚厚个木盖，封了木盖个井台就此成了男小人登高作将军个舞台，成了“骑马打仗”个指挥塔；成了女小囡翻麻将牌、白相游戏棒个好地方。只有到了夏天井盖才会打开，附近人家买了西瓜放进网兜里或者搏只竹篮头弄几瓶汽水吊到井水里“冰镇”，伊个辰光呒没人会拿走别人家个东西。几百户人家个大弄堂，七、八口井从来呒没为此发生争吵。大热天井水阴冷冰人，胆子大个小人就勒拉井旁边用井水汰浴，我自然不敢。不过也学会了吊井水，用井水泼了晒得滚烫滚烫个后门口，夜里乘风凉，一把躺椅数星星。现在上海勿要讲水井难寻，连星星也看不到了。

老偶然个还会看到有小青年坐了井盖上规规矩矩谈恋爱，不过肯定不是阿拉弄堂里个，想想总比老远跑到外滩爱情墙里钆闹猛要方便多了。

今朝麦琪里拆脱了，井填脱了，只有关于井个故事还勒拉脑子里。  （顾顺麟）